Monthly Archives: April 2015

身邊不乏可單獨約會的異性朋友卻一直聲稱自己單身的Kenny，聽聞最近終投蜜運，而且對方還要是他那些紅顏知己給他介紹的。雖然Facebook上尚未出現in a relationship的status，但憑他跟以往被我們為他和他的紅顏知己製造緋聞時的反應差別看來，這位灑脫多年的單身貴族，實然主權已告旁落。   然而，昨晚的朋友聚會中，Kenny被問起感情狀況進展時，卻愁容隱現，比上月他得知金管局提升按揭成數上限令他買樓夢碎時還要嚴重。能令向來灑脫的Kenny悶怕不樂，想來事態嚴重，需要嚴刑迫供。以下為眾人合力灌他三shot後錄得的供詞：   「其實理論上都冇乜嘢，前排佢話佢部電腦隻keyboard壞壞地，咁我早兩日見放假咪幫佢買過隻新，拎埋上佢屋企幫佢裝……」   「嘩，乜咁似觀音兵上娘娘屋企砌機整機啲故事嘅？兵已做？」口賤的Robert忍不住插嘴。   「妖，我又唔係你，如果係做兵咁小事就唔會值得講啦。」在對Robert的恥笑聲中，大家似乎都沒有太在意Kenny後半句的問題發言。   他之後繼續解釋說，那天（準）女友的父母都在家中，另外還有一兩位親戚在，（準）女友的父母本欲邀請他留下晚飯，但他因為之後還要趕去機場送機所以推卻了，並在確定新keyboard沒問題後不久就獨自離開。   「即係得罪咗未來外父外母所以愁？定你單拖去送機嗰個係你啲紅顏知己所以激嬲咗條女？」   「唔係，而係我咁趕咁樣走上去幫佢換keyboard，從結果而言係令佢好似無啦啦做咗衰人咁……」   「唔明。」「你up乜春？」不解之聲四起，前面那句來自小弟。   有點酒意的Kenny望望眾人，眼見似乎無人明白其戚戚處，樣子甚是冇癮，最後只補充了一句：「善意有重量，太重會失衡，受嘅一方會內疚。」   其實當時也許不是無人明白Kenny，因為向來媾女當飯食的Anson，聽了一半時已經樣子比他更冇癮地說要到外面煲枝煙，之後再沒回來，可能是出於對其婆媽過慮的不屑，又或是對他能找到值得如此操心的對象的妒忌。   「條女唔奉旨，你又咪食屎！」這是Anson半小時後似有所指地在Facebook上的狀況更新，like者甚寡，但Kenny在其中，還回覆了一隻含淚的Pusheen。   其實小弟本來想用Anson的這條status來當標題，但由於過於粗俗所以作罷。至於他們這些女人湯圓之間的煩惱和交流，我這種死毒男只能表示識條鐵。